“FRAKSHON DI MFK DEN PARLAMENTO TA FELISITA MINISTER SILVANIA PA E ECHO KU A HABRI LANDFIL PA 2 LUNA LARGU PORNADA PA TUR TRUK, KOMERSIANTE I HENDE POR DEPOSITA NAN SHUSHI NA LANDFIL MALPAIS SIN GASTU MARA NA ESAKI”
Willemstad – Frakshon di MFK, pa medio di parlamentario Juniel Carolina ta felisitá minister drs Javier Silvania pa e echo ku a yega na akuerdo ku Selikor NV pa komienso di 1 aprel 2024 durante 2 luna habri landfill pòrnada pa tur vehíkulo ku ta transportá shushi, negoshinan i tambe tur siudadano ku kier depositá nan shushi na Landfill Malpais.
E akuerdo di 2 luna pa habri Landfill pòrnada ta basa riba un desishon ku e tim di trabou Dam Pretu a yega basa riba e reklamo ku transportadó di shushi ta reklamá ku Selikor NV ta kobra muchu karu kompará ku Dam Pretu i otro sitionan kaminda ta dùmp shushi ilegal. Banda di esaki tambe e periodo di grasia ta pa evuala ku e komportashon di e transportadónan di shushi a kambia ku e bashamentu di shushi na Dam Pretu i e otro sitionan ku ta dùmp shushi ilegal i e periodo lo sirbi tambe den kuadro di luna di sèptèmber ku ta luna di limpiesa pa Kòrsou kompletu uni konhuntamente ku ministerio i instansianan di Gobièrnu, kompanianan di transporte, kompanianan di ekiponan pisa, komersiante, fundashon i boluntarionan pa limpia Kòrsou limpi limpi.
Por a nota ku ya tin akshonnan tumando lugá di limpiesa di plenchi, bario, vianan prinsipal i tambe roinan i ta e intenshon pa ministerionan di Gobièrnu huntu Selikor NV laga pone baki di shushi den barionan i asina práktika e proyekto di medioambiente kaminda ta kuminsá konsientisá nos hendenan pa nos mes limpia nos bario i kura kas i sigui mantené esakinan limpi.
Gobièrnu pa medio di ministerio di finansa lo kubri e gastunan durante e periodo di grasia di 2 luna di shushinan ku wòrdu di dùmp na Landfill Mal Pais i asina esaki no tin influensia negativo pa ku e presupuesto di Selikor NV.
Despues di 2 luna e grupo di trabou lo mester evuala e proyekto di bashamentu di shushi pòrnada na Landfill Mal Pais, dependé e kambio di e komportashon di nos hendenan, por skohe pa alarga e 2 lunanan ku algun luna mas, por skohe tambe definitivamente habri landfill pòrnada, por skohe tambe pa definitivamente pa baha e tarifa di kual frakshon di MFK tin un kambio di lei di shushi entrega kaba i ku na e momentunan aki ta na RVA pa konseho.
Tur e posibilidatnan ku tin riba mesa pa skohe, ta pa evitá ku shushinan ta keda wòrdu di dùmp na Dam Pretu i na otro sitionan ku ta dùmp shushi ilegal i evitá ku shushi ta wòrdu pega na kandela i ku molèster di huma i holó desagradabel ta molestiá abitantenan den bisindario di tipo di aktividatnan asina ki.
Pa loke ya trata Selikor NV den kuadro di e 2 luna pa basha shushi pòrnada na Land Fill, mester adaptá i mehora e servisio na e ofisina di e balansanan pa evitá ku ta krea fila hopi largu, pone mas trahadó i ekipo pa atendé ku shushi kaminda ta atendé ku shushi, alarga e orario pa Land Fill keda habri mas lat pa tuma shushi, e reklamonan di ku karchi di kùr di vehíkulo kaduká, no por drenta Land Fill Mal Pais i na e transbordo di shushi di Selikor NV na Koralspecht mester hasi sierto adaptashon pa keda habri pa servisio mas lat, duna servisio bek riba djadumingu i pèrkurá pa ta sufisiente personal, material i ekipo pa atendé ku e kantidat mas amplio di shushi.
Frakshon di MFK ta spera ku awor ku Landfill ta habri 2 luna pòrnada doñonan di trùk i otro vehíkulonan ku ta transportá shushi, stòp di bai dùmp shushi na Dam Pretu i otro sitionan kaminda esaki ta tuma lugá, pasombra e kontrolnan ya ta severo di Bándariba te Bándabou dor di diferente ministerio ku nan tim di mantenshon órden públiko riba diferente área manera bashamentu di shushi ilegal, kimamentu di shushi, tapamentu di shushi o otro material manera santu o greis , diabaas, bashamentu di awa shushi na sitio o kosta no apropiá, kuementu di diabaas ilegal, okupashon di tereno di Gobièrnu ilegal i pronto e timnan ya menshoná lo ser amplia ku kompania di seguridat priva i tambe polis kombiná ku marinier o VKC. Ku tur e akshonnan ariba menshoná poko poko pero sigur Gabinte Pisas 2 ta dunando shushi balor i tambe e leinan ku ta prohibí pa bashamentu di shushi na sitionan no apropiá tambe balor i mas frakshon di MFK ta apresiá ku ya kaba por nota ku Kòrsou ta bai bira i keda limpi i for di awor na nòmber di frakshon di MFK den parlamento nos ta deseá Gobièrnu di Kòrsou i Selikor NV i tur ku ta involivi i aportá den akshonnan di limpiesa den luna di sèptèmber un felis luna di limpiesa i ku mas bista riba desaroyo kon pa sigui atendé ku shushi i sigui duna shushi balor.
